Aðalmarkmið lífsleikni er að efla siðferðisvitund barna, ásamt sjálfstrausti, sjálfsaga og samkennd. Megininntak lífsleikninnar í Maríuborg er dygðakennslan, en á hverri önn er tekin fyrir ein dygð.

Dygð er skapgerðareinkenni sem er talið jákvætt, persónueinkenni sem leiðir til réttrar hegðunar eða breytni og jákvæðra tilfinninga. Þetta eru sammannlegir þættir sem flest samfélög hafa að grundvelli siðferðis og reglna, en í öllum samfélögum eru ákveðnar dygðir sem eru í hávegum hafðar og þykir vert að tileinka sér. Þegar við tölum um sammannlegar dygðir erum við að tala um dygðir sem fylgt hafa manninum frá örófi alda, burtséð frá stað, tíma og menningu.

Lífsleikni er rauði þráðurinn í öllu okkar starfi með börnunum, í hópastarfi, frjálsa leiknum úti og inni, í sögu- og söngstundum og í matartímum. Lífsleiknikennsla þarf að fara fram allan daginn alla daga, ekki bara í leikskólanum, heldur líka heima. Þess vegna leggjum við mikla áherslu á gott foreldrasamstarf.

Kennarar Maríuborgar hafa það ætíð í huga að sýna góða fyrirmynd og leggja sig fram um að tileinka sér dygðirnar í öllu starfi, framkomu og verki. Einnig er foreldrasamstarf afar mikilvægt í öllu námi og dygðakennslan ekki undanskilin, foreldrar fá afhent bækling um hverja dygð þegar hún er tekin upp og eru hvattir til að vinna markvisst með leikskólanum að innleiðingu dygðanna.